孖汪明荃合唱　王菀之被「吊」驚到面青

藝人汪明荃（阿姐）入行50周年，今晚假電視城錄影《海馬牌床褥特約：汪明荃2017金曲夜》，邀來楊千嬅、周慧敏、古巨基及王菀之等擔任嘉賓，場面熱鬧。凡事力求完美的阿姐出動不少私伙靚衫「贈興」，而贊助商又為阿姐準備了超過400萬的鑽飾，老公羅家英驚喜亮相，陰聲細氣叫阿姐加油，氹得阿姐笑到四萬咁口。

至於王菀之與阿姐合唱《自由女神》時被「吊」上半空，嚇到有畏高症的王菀之錄影時向阿姐說：「暫時唔講得嘢住…好多手汗呀！」事後受訪她靦腆謂：「畏高係天生嘅，我都唔想。綵排我驚到面青，工作人員已經冇升到我咁好嘞。我梗係冇阿姐咁瀟灑啦，曾經想鬆手唔揸住條威吔都唔得，不過投入咗唱歌就冇咁驚，好榮幸能夠同阿姐合唱嘛。」