娛樂專題:洪卓立回憶球場打交輸多贏少

2017年06月01日 06:44
東網電視
更多新聞短片
Ken喺上水居住多年,最有印象係石湖墟遊樂場。

歌手洪卓立(Ken)自小在上水成長,對於這個充滿人情味的地方,Ken坦言充滿回憶。講到舊居對出的球場,Ken滿載的不是拍拖回憶,而是每日放學等待爸爸一起回家吃飯,更坦言人生第一次打架,也是這裏發生,又笑言可惜最終未能取得勝利!

講起洪卓立(Ken),大家必定想起他的歌曲代表作《彌敦道》,不過帶給Ken最大回憶的其實並非旺角,而是他成長之地——上水。

於上水居住多年的Ken,在石湖墟遊樂場勾起不少回憶,除了留下不少腳毛,放學與同學仔打籃球外,更是Ken與爸爸溫馨的回憶,他說:「以前上水冇咁多人,好記得以前放學之後,會坐喺櫈度睇書或者做功課,大約等到下晝點幾鐘左右,爸爸就會放工返嚟,喺呢度接埋我返屋企食飯。(自己一個人等爸爸唔驚咩?)唔驚,其實好安全嘅,所以真係冇乜問題。(咁有冇同之前啲女朋友喺度坐過?)咁又冇喎!因為通常係去食飯睇戲,好少喺公園坐嘅。」

打波定打人?慘成輸家

除了一幕幕與爸爸的回憶外,Ken笑言於球場更留低不少「曳豬」回憶:「學生年代同人打波嗰陣,贏輸都難免有言語上嘅挑釁,聽完之後都會有肢體上嘅碰撞嘅,但我多數都係打輸嗰個!」

在球場旁邊白色的大廈,正是Ken的舊居,原來在Ken年少時因隔壁大廈火燭,他突然要走火警,印象至今難忘:「好記得有一年係我隔籬棟大廈火燭,所以就着住拖鞋衝落嚟走火警,當時又係走落嚟呢個球場,所以呢個球場真係畀到好多回憶我。」

一碗麵的緣分

講到上水給Ken的第二個回憶,不得不提就是他由細食到大的麵店,訪談當日,當Ken甫到麵店,老闆即走出來歡迎,Ken對麵店讚口不絕外,原來與麵店亦甚為有緣,他說:「有次去電台接受訪問,係介紹一間好好食嘅餐廳,我就介紹呢間麵店,我唔知原來有個DJ朋友係呢間店嘅親戚,佢聽到有個新人介紹間舖,佢就搵我,之後識咗。點知個DJ有個親戚又係我中學同學,發現呢個世界真係好細。」

儘管現時Ken已不在上水居住,但講到對上水的感覺,仍帶點甜笑,他說:「上水對我嚟講係一個充滿回憶嘅地方,由出世開始就住嗰度,必經階段都喺上水發生。」

髮型:Davy Yu@FIFTH SALON
化妝:Zoefan@ig zoefan
服裝:izzue@ithk