「遇劫」真相未解！林雅詩返港離奇暈低

藝人林雅詩（Grace）最近飛到馬來西亞工作，日前在Facebook玩直播時聲稱被搶手袋，之後突然「轉軚」表示只是誤會一場，事件十分離奇，引起當地民眾及傳媒高度關注，質疑Grace「造假」。馬來西亞警方發言人表示要求Grace必須澄清為拍戲，並建議有關方面考慮將她列為不受歡迎人物，禁止日後再進入馬來西亞！

據知林雅詩提前在昨日下午秘密返港，有人在機場目睹她與經理人馬天樂、助手及工作人員陪同下現身，戴着口罩的林雅詩頭耷耷、閃避返港，更在機場再次上演一幕「離奇」暈低事件！

本來行得走得的她，怎知到了停車場等車位置，她突然發軟蹄成個暈低，但奇就奇在身邊人好敏捷將她扶住，馬天樂仲大聲叫她：「Grace！」雖然在場有幾個壯丁男同事，但抱起Grace上車卻是女助手，見她好似完全冇反應，但他們未有第一時間call白車，反而抬住她登上保母車走人，確實「離奇」。

而馬天樂接受東網訪問，談到林雅詩身體如何時，他說：「未知，我都未知。（佢依家喺屋企定入咗醫院？）我要問一問佢先答到你。（咁依家直播事件發展成點？）有消息再話畀大家聽。」之後匆匆收線。至於林雅詩電話就接駁至留言信箱。