翠如BB唔見咗？蕭正楠出重酬「尋人」

使唔使咁曬？同黃翠如拍拖三年嘅蕭正楠，依家喺橫店拍緊無綫新劇《宮心計2深宮計》，橫店出名夏天又熱又曬，但係蕭正楠比橫店嘅太陽更曬，曬乜？今日蕭正楠喺微博上載黃翠如晒V相，留言：「橫店第十一日！尋人啟事，好重酬！」事關翠如BB就喺香港拍緊《溏心風暴3》，分隔兩地，正所謂一日不見如隔三秋，仲要蕭正楠一向同翠如BB都咁sweet，難怪會咁掛住對方！唔知佢哋隔咗幾多個秋冇見呢？

而啱啱，翠如BB終於「交人」喇！佢上載自己張相，之後留言：「太認真玩所以消失了一陣，報到了，我老大。」佢哋兩個隔空傳情，網友都話骨痺到爆呀！