整親邊度?鄭伊健新傷舊患共冶一爐
鄭伊健出席戲院開幕活動,他表示到戲院睇戲是平常事,並笑言:「拍戲係自己工作,睇戲係自己興趣,鍾意睇特技同科幻電影。」他指新開的4D動感影院可以有低頭掃腳,會有被人篤背脊的效果,十分過癮。

提到近日未有出席公開活動,伊健解釋近日拍攝《古惑仔》原班陣容演出、由錢嘉樂執導的新片,他說:「三月開始拍,拍咗兩個幾月依家break一吓。(套戲叫咩名?)未講得住,因為改咗好多次。我哋去咗好多地方,拍日本、布達佩斯、黑山,仲有其他地方。」

伊健透露拍攝該片動作戲時弄傷了膊頭:「今次係第三次,舊患加新傷,趁佢哋睇緊景,停一停休息吓。(要做物理治療?)睇唔同醫生,又要放血,我第一次睇醫生時,話要吊住兩個月。(沖涼有困難?)當日有啲忟水。(老婆餵你食嘢?)返嚟都好咗好多啦!(煲嘢畀你補身?)冇呀!(依家好番幾多成?)手尾有啲長。(要做手術?)唔使,移咗位要托番,總之好棘手啦。」問到之後會否再拍動作戲,他謂應該七月中再拍,有時間休息。