明星唔易做！鄧萃雯負資產諗計填氹

藝人鄧萃雯（雯女）憑內地劇集《繁星四月》中的精彩演技，成功掀起熱話。雖然很多人都覺得雯女的演藝路十分暢順，但雯女早前現身福音節目《恩雨之聲》時，卻坦言無論是成長路還是演藝事業，她均曾經歷不少挫折。

冇諗過做演員咁辛苦

自小在破碎家庭長大的雯女，懂事以後未曾試過與父母同住，陪伴其成長的，只是家務和學校生涯。雯女坦言當時面對同齡同學，有強烈的自卑感，所以更渴望成功。自言幸運的雯女，一入娛樂圈便當上主角，但隨之以來的卻是不安感，雯女說：「當時我冇諗過，原來做演員係好辛苦，頭五年就係日接夜，夜接日咁喺片廠度過，幾乎冇自己嘅生活；亦覺得好被動，因為唔知幾時公司唔再捧你，或者觀眾唔再喜歡你。」正正因為無法解釋的不安感，雯女選擇在事業如日方中的時候，跑去讀書進修，但隨之面對的卻是生活費及學費讓其花光所有積蓄，結果雯女被逼在得到學位之前，再次返港重拾演員生涯。

自覺係暴發戶

之後雯女戲劇性地遇上人生第二個高峰，亦是這個高峰，讓雯女不懂滿足：「當時我得到亞州電視高薪挖角，短短兩年，拍咗二百集劇集。我第一次經歷到，原來做明星賺錢好容易。我覺得自己係暴發戶，見到想買嘅衫、名牌、鍾意嘅車，諗都唔諗就買，去旅行亦唔會計住用咗幾多錢。」在迷失於金錢物欲的同時，雯女因為在金融風暴前夕置業，再次經歷了低潮及打擊：「我萬萬都想唔到，原來我生平最大一次嘅投資，所有嘢都可以喺金融風暴入面咩都冇晒。為咗要填負資產，我嗰時會去一啲好雜嘅地方做騷登台。我又好怕冇人搵我做嘢，所以我日日都會化個妝去見報，做紙上明星。」

感情生活一塌糊塗

談到戀愛，雯女亦不無感嘆：「我曾經覺得可以用拍拖、用戀愛去證明我係有能力去愛人，亦係值得被愛嘅。但往往喺呢啲亂咁搵嘅愛情入面，會錯好多，感覺來得好快，亦走得好快，我最後嘅感情生活係一塌糊塗。曾經有個男朋友喺分手時講過，我係一個『完全不知愛為何物』嘅人。」

修補同家人關係

在雯女「欲求不滿」、感到無助及迷失的時候，她感恩能重遇耶穌，讓她心靈長久以來的缺口得以填補：「當我返番教會，第一個參加嘅活動主題就係迷戀，簡直當頭棒喝咁話我聽，用愛情搵嘅愛都係假嘅，所有嘅追求都係虛空。估唔到喺我一敗塗地時，耶穌竟然仲喺度等我，佢扭轉咗我以前嘅價值觀，畀機會我喺四十歲之後，事業再上一層樓，亦賜我力量，去修補我同我屋企人嘅關係。我相信唔係重遇耶穌，係唔會有咁樣嘅鄧萃雯坐喺度。」