拎袋做阿四　陳柏宇孖未婚妻濕平慳到爆

歌手陳柏宇（Jason）與模特兒未婚妻符曉薇（Leanne）早前遠赴倫敦拍攝婚照，將於下月拉埋天窗的二人不時形影不離，日前他們又現身銅鑼灣拍拖二人世界。當日下午約五時，兩人一身情侶裝打扮，雙雙穿上白色T恤，於該處商場閒逛，但行了一輪卻沒甚斬獲。而Jason早前曾表示已花了六位數籌備婚禮，所以與Leanne有共識應慳則慳，當日亦見他慳到盡，行完街便與Leanne於商場的美食廣場買兩碗麵醫肚後便匆匆離開。期間Jason還預演其「廿四孝老公」，為未婚妻孭着花花袋做阿四，就算有Fans上前要求合照，他亦袋不離身，之後二人手拖手去買麵包，當路過名牌開倉宣傳廣告牌時，一心執平貨的Jason還駐足與Leanne研究了一會才離開。