黃奕晨否認有未婚妻　同Cheronna了解中

藝人黃奕晨（Dixon）與四位電影小演員出席活動，接受訪問時，他透露即將於7月中開拍ViuTV新青春偶像劇扮學生，更會與《美選D.n.A.》冠軍羅伊婷有感情線，但就未知道會否有親熱戲。提到新劇可會有前輩演員參與，Dixon指今次就會以四位新演員擔正，笑言都有點冒險：「好彩唔使拍鬼片，我睇《詭探》睇到一半都熄咗啲聲，咩都唔驚但就係驚鬼。（有試過遇上靈異事件？）有次毅行者去到尾段，成日覺得有人行過，但之後討論番有人話冇人行過。（如果公司要你拍鬼片？）搵我做鬼，嚇人有feel啲。」

暗示想同Cheronna拍拖

另外，談到有指有未婚妻的Dixon與Super Girls成員Cheronna暗撻4個月，Cheronna更硬撬Dixon，對此Dixon直言有睇報道，謂：「我都唔知幾時無啦啦多咗個未婚妻，我27歲冇咁快結婚，點會咁魯莽去求婚。」他又指自己暫時單身，問到兩人是否玩地下情，他即否認並表示跟Cheronna認識時已經是單身，現時還在了解中。提到是否對Cheronna有意思，他說：「有少少，幾好呀，開朗又好動。（差啲咩未一齊？）差啲大家有個moment啱嘅。（報道話你哋開始咗4個月？）我都想拍咗4個月呀，邊有咁密。報道話我哋去咗京都，但其實張相係佢舊年前拍《三日兩夜》嘅相。（你都有留意？）喺飛機好奇睇到。」