名人：婷婷苦練廚藝搵霆鋒謝賢做白老鼠

藝人謝婷婷出席活動時透露，剛剛得悉父親謝賢從內地返港，希望能一起慶祝父親節：「佢好忙，希望佢接受同我慶祝。」婷婷興奮地表示今天首次成功煮了一餐美味午餐：「我煮咗三文魚、菠菜同蘑菇，仲特登影咗畀霆鋒睇，但佢冇覆我，唔知佢喺唔喺香港？覺得我唔合格？（阿哥煮嘢咁好食，有冇覺得好大壓力？）唔會，我同佢唔同，我十分鐘就搞掂，或者試吓父親節煮畀爸爸食，其實我媽咪煮嘢食都好㗎，爸爸就鍾意試實驗嘢，我周不時都想去佢屋企幫佢執雪櫃，佢有好多就快過期嘅嘢食，通常佢會將就快過期嘅食物放晒喺一煲度煮。」

「鷹眼」仲未試餐

問荷里活型男「鷹眼」男友謝洛美維拿（Jeremy Renner）可有試過她的廚藝？婷婷回答：「冇試過，其實今日先至我第一次真正煮一餐出嚟，嚟緊會試多啲，搵爹哋同阿哥做白老鼠。」對於姪兒Quintus手受傷打石膏，婷婷表示不知情，會立即打電話問清楚。