吳綺莉接受卓林同性交往:我好開通
單親媽咪吳綺莉(Elaine)因與女兒吳卓林起衝突而被迫分開,早前卓林終於返家,母女重修舊好,大團圓結局。Elaine亦整理心情重新出發,於銅鑼灣分享接受美容療程後的心情,Elaine放下長髮,並以露肩裙高跟鞋現身,充滿女人味。Elaine直言個性男仔頭,因此平日少保養,最近敷得多面膜反而爆瘡。
要做個好榜樣
問到女兒有否幫幫眼?她說:「冇,我都大個女啦,會自己注意儀容,希望可以做個榜樣,亦令自己睇落健康啲,都可以努力工作。早幾個月都冇嘢做,因為要返上海處理屋企啲嘢,加上壓力真係好大,都連續幾個月,多謝朋友一直支持,真係好攰。」問女兒是否繼續睇醫生?Elaine表示:「一直有社工同醫生幫手,身為媽咪我之前忽略太多佢嘅感受,係日積月累,我唔止要改變外貌,要提升埋自己內心,依家我接受咗情緒病呢樣野,要去接受同面對。」
卓林有食緊藥
問母女是否因交友問題而衝突?Elaine說:「依家會學習接受,佢係單親家庭,而且情況好特殊,我接受到唔代表佢接受到,搞到佢壓力爆煲,多謝朋友幫手,依家學識堅強同冷靜。(仲有自殘?)有食藥,一個媽咪見到小朋友受傷都唔開心,唔可以怪佢仲要調校好自己,要感恩,呢個情況係早發現,並唔係冇辦法補救。(戒咗酒?)一滴都冇飲,食飯飲杯酒都好正常,但都冇飲,我係要用行動話畀個女知,係一定可以做到。」
「做婆婆先驚!」
問到是否因女兒與網路紅人交往而衝突?Elaine否認:「唔可以怪人哋,我係忽略咗佢感受,媽咪對唔住佢,有當面講對唔住。(卓林同網紅拍緊拖?)朋友啦,佢17歲仲摸索緊,唔知佢會點,就算有都唔會係最後一個。(接受到個女鍾意女仔?)我好開通,冇所謂,如果佢同我話有咗要做婆婆我驚啲,性別唔緊要,最緊要照顧到彼此,心地善良,錫我個女。」