陳嘉寶親手畫父親節卡　失手串錯字

父親節就嚟到，唔少人都喺到諗可以送啲咩禮物畀阿爸，折現又好似老套咗啲，買嘢又唔知買啲咩。而十一月就下嫁畀圈外男友嘅藝人陳嘉寶（Anjaylia），就決定畫一張卡送畀阿爸做父親節禮物。相中可見，張卡用木顏色畫咗啲生果喺上面，不過就唔小心串錯「Father」做「Farther」，再外加一枝古龍水，雖然唔係啲咩貴重嘅禮物，不過咁有心思，相信Anjaylia嘅阿爸都會好鍾意呢一份禮物。

對於親手送卡送畀爸爸，Anjaylia接受東網訪問時謂：「其實成廿年都冇畫畫畀佢，今年心血來潮咪畫張卡畀佢囉，過程好緊張呀，畫咗好多張都唔滿意，但最後揀咗呢張。（串錯字喎！）其實好多朋友都有睇過，但都係主要留意邊張畫得靚啲，同我一樣都無為意串錯字㖭，連爸爸睇咗都笑咗一笑，話我由細到大都咁粗心，由細到大都冇變過。唔緊要啦，一個美中不足，惟有請佢食飯補數，年年都咁過，孝順就日日都係父親節啦，爸爸都好開心。」問到Anjaylia點樣同爸爸慶祝父親節，佢話：「同爸爸食牛扒慶祝，因為佢鍾意食牛嘛。」