鍾舒漫鍾舒祺姊妹檔拍18禁片！網民爭住睇

歌手鍾舒漫（Sherman）同細妹鍾舒祺（Sukie）感情不嬲都好好，佢兩個仲成日拍埋啲無厘頭短片放上網，引到班網民笑到有腹肌。近日Sherman上載兩條最新短片，就見到Sukie嘅搞笑功能又再更上一層樣，連網民都叫佢快啲轉型做諧星！

片段中，原本佢哋一家四口去街街好溫馨，Sherman同Sukie仲一人一邊挽住鍾爸爸向前行，而鍾媽媽就負責喺背後拍片，畫面真係好有愛！點知Sukie突然「癱瘓」，成個人打斜行，仲要連癱兩次，搞到拍片嘅鍾媽媽笑到「扯蝦」，對細妹無厘頭行為見怪不怪嘅Sherman就忍唔住喺短片度配字幕問：「媽咪…真係咁好笑？」有網民即刻留言代答：「其實真係好好笑。」

另一條短片就被網民喻為睇到「眼火爆」，事關佢兩姊妹做咗標題黨，短片畫面一開始就有字幕寫住：「破天荒之必睇 5招教你XXX 18歲以下禁」，搞到網民心癢癢撳入去睇，點知…畫面係Sukie問大家：「你係咪因為條題目㩒入嚟呢？其實條片冇嘢架！」然後對住鏡頭瘋狂大笑，而Sherman就一直企喺度好似蠟像咁郁都唔郁，最後條片仲有句Caption寫住：「舒漫舒祺宗旨 人生9成時間都需要無聊。」有網民就神回：「無呀，純粹cilck入去睇妳哋點無聊」，仲話希望佢哋拍多啲新片俾大家笑吓！

網民有話兒：

six.m.o.7x9：味（未）食飯 腳都無力

elsachan0716：爸爸表示心好累

allexxxrrie_b：不如阿妹做諧星啦，真係好有潛力

mxxxlover：你地（哋）可以做個組合 似艾粒 果（嗰）D（啲） 哈哈 救命 sukie 傻左 （咗）

micxxxxhael：I want to 揼揼you，但我還是喜歡你們❤