父親節羅生門！張繼聰畀個仔搞到嗌吹咩

東網電視

究竟阿聰鍾唔鍾意呢份禮物？

今日係父親節，大家屋企應該開開心心同爸爸食個飯慶祝，再送份禮物畀爸爸就更完美喇！但點知發生「羅生門」事件！大家睇睇謝安琪個fb，佢上載咗張風扇仔嘅相，以《瀟灑的父子》為題寫咗篇文。

全文如下：

「《瀟灑的父子》

今日父親節，我個仔乜嘢都冇準備，我老公讚佢瀟灑

然後我問佢係咪應該都有少少野（嘢）送俾（畀）爹哋？

於是佢唔知係邊度摷到一個，佢自己唔鍾意嘅風扇，晚餐時送俾（畀）爹哋

然而，佢老豆（竇）都好瀟灑：佢見到個仔俾（畀）份咁嘅禮物佢，佢接都冇接到，手都冇伸出嚟

宜（依）家個風扇就咁滯留咗係（喺）枱面，場面相當無奈

完」

嘩！成件事尷到冇朋友，唔怪得謝安琪都嗌無奈！但另一邊廂，張繼聰都有上載呢張相，但佢嘅講法又唔似謝安琪講到無奈喎，佢留言：「我個仔送俾（畀）我嘅父親節禮物，我問佢：你買㗎？佢話：唔知邊道搵出嚟....我諗依份禮物嘅寓意係....吹咩！？

Anyways , 多謝，外景啱用」

雖然兩邊講法有唔同，但一向鍾意同網民互動嘅謝安琪，喺粉絲追問風扇下落嘅時候就留低咗四個大字：「仲喺枱面」！咁即係點？係張繼聰唔收呀，定係佢聽日有外景所以唔收埋方便聽日拎嚟用？！真係冇人知喇～

on.cc東網