舞台劇講社會　王菀之自爆「小人」纏身

歌手王菀之（Ivana）、梁祖堯及湯駿業（Ah Dee）最近為7月7日起公演的舞台劇排練，Ah Dee透露一眾演員會在劇本加入自己的構思：「放我哋見到『小人』嘅嘢，或者經歷過啲衰嘢。呢個戲可以長做長有，係因為大家冇渠道發洩，睇完笑完就好似Recharge咁。小人係仍然存在，但我哋除咗鬧同發脾氣，都可以輕鬆咁過咗佢。」Ivana即認同說：「大家都覺得，梗有一個喺左近！」

提到祖堯早前去了紐約，他認為當地與香港都有很多種族仇恨及歧視，是很好的題材。度橋時，Ivana覺得大家就像聊天一樣：「大部分橋喺小龍（導演兼編劇黃智龍）度，佢開個課題出嚟，問我哋遇過咩經歷，然後分享。」 Ah Dee表示有時排戲前大家會在工作坊Brainstorm最新熱話：「譬如第五集有個關於小巴嘅情節，嗰期流傳巴士或者小巴爭位嘅事，我哋就Jam吓，一個做司機，其他人就上車、落車，睇吓會發生咩事。好簡單嘅情況，但大家Jam啲奇怪角色同唔同嘅事。港鐵都好多怪人怪事，但覺得空間太大。」

除了綵排舞台劇，Ah Dee坦言正籌備新專輯，派歌後會決定何時出碟，下年可能開騷。Ivana聞言說：「你自己導演埋呀，我鍾意睇你自己導演嗰啲。舞台劇之後我諗住寫番多啲歌，為新專輯寫歌同錄音，有啲Concept可能要提早成年開始籌備，依家諗緊。」祖堯笑言不會推出新專輯，請大家放心，今年亦不打算再出版食譜：「紙媒好難做，我已經算賣得，但都係冇乜作用。會搞另一啲Project，例如關懷社區，關於食物同老人家，做啲真係幫到人嘅嘢會開心啲。」