泳衣襯透視褲　陳慧琳晒Fit爆身材

歌手陳慧琳（Kelly）出席護膚品活動，她以泳衣配襯透視褲，十分有型！提到她十分性感？她笑言不濕身就不性感，做演唱會時最Fit ，但不能停留最Fit狀態。她亦透露暑假會帶小朋友去游泳、遊樂場放電，而且小朋友愛下廚，會整意想不到的刨冰。她更自爆小朋友游泳曬黑了，笑言自己在室內用望遠鏡遠望，踩單車會選擇陰天，太曬會在車上望住小朋友。

想玩交換家庭

提到楊千嬅想玩交換家庭，帶兒子到Kelly家，Kelly 笑言：「我有兩個着數啲，好Welcome 。佢哋差唔多年紀，應該玩得埋，而我哋兩個就去Shopping 。（邊個睇？）老公。」問到有甚麼家規？她直言：「冇，入屋要除鞋，我食飯唔開電視，但有時想娛樂佢哋就會開，但係開咗大仔會去熄電視，覺得點解食飯開電視，做咗管家。食飯用筷子，如果用得唔好會用手，我會話佢哋，但令到佢哋對炸雞翼應該用手定筷子有啲混亂。」

力撐譚芷昀

提到唱出國際而爆紅的「香港小巨肺」9歲女童譚芷昀（Celine），Kelly表示有留意，笑言想找她的爸爸教自己，好勁。提到Celine被指無童年？Kelly謂：「冇辦法呢段時間，間唔中比賽，可以有成就感，學到咩都係小事，唔怕困難，有經驗，從中學習，讀萬卷書不如行萬里路，唔一定死讀書，親子時間，有親情。（畀你個仔學？）有咁叻就好，我都唔識教，逼唔到，唱兩句就唱完，會覺得好悶。」問到兒子有甚麼天份？她笑言自己都想知，自己都是大個先知天份，最重要係努力同做人態度。