行紅地氈見暈　衛詩雅着唔夠衫冷親

藝人衛詩雅出席活動與歌手陳柏宇、沈震軒、俄仔Ansheles及莫竣名（Louis）台上玩互動。期間，主持要俄仔Ansheles餵詩雅食蕃茄，Ansheles見詩雅穿白裙已說：「好緊張，怕啲嘢食跌落佢條裙。」之後Ansheles想叫詩雅張開口，但用錯詞語說：「你開大個口先。」身旁司儀森美即笑謂：「開大？你講到我有便意。」笑爆台下。而詩雅要和Louis情深對望5秒，搞到Louis好怕醜反要詩雅捉住他。

至於詩雅稱剛去完上海電影節，講到由香港飛去上海那天便Delay了一個通宵，自嘲是烏鴉咀說未試過Delay，終於原定晚上7時起飛，等到凌晨12點上機，但因為雷暴等到凌晨2點最後航班取消，他們在機上又要再等有巴士接載回機場，最終入返機場，她和助手及周柏豪及他的經理人一行六人決定在機場等天光，之後再乘早機飛去上海。詩雅謂：「因帶唔夠衫，最後去到上海冷親，行紅地氈時見暈，好彩阿嬌（鍾欣潼）有帶感冒藥喺身，我先撐得住。」