歌手衛詩（Jill）到柴灣為攝影師劉翁主持的ViuTV節目《攝·太帥》擔任嘉賓，她透露在節目中將為參賽者擔任模特兒，作品將有機會用作新唱片封套：「會有兩個造型，其中一個係貼滿紋身貼紙。（性感？）露吓肩咁啦！」Jill又表示最難忘的拍攝經驗是2008年時以奧運為主題的唱片封套：「當時係一共拍咗廿個造型，足足拍咗幾日，擺好多運動主題甫士，係幾好玩。（出得晒？）都有十幾個有用到。」

Jill被問到有否接觸攝影？她笑說：「都有接觸過，影相經營吓社交網。（即係自拍高手？）自拍有時都幾尷尬，想搵人請教吓用單反影相。（諗過出寫真？）都想試吓。（Keep Fit做準備？）你哋覺得我有冇瘦到？我都減咗幾個月，主要係戒小食、減少份量同埋做運動，最緊要係有恆心，唔係會反彈。」Jill又表示最近會回到錄音室繼續做音樂。