「文青女神」袁澧林（Angela）憑斯文獨特氣質人氣愈來愈盛，最近她為宣傳青春校園電影連番展示歌喉，原來歌聲相當動聽，又多一樣潛質被發掘，日前Angela與電影男主角兼澳門歌手彭永琛（琛仔）接受東網專訪，預備了兩首歌送給東網Fans，先由琛仔彈結他兼主唱新歌《那一年我17》，Angela負責和唱，兩人一唱一和相當合拍，其後到Angel獻唱歌曲《寶貝》，大晒甜美歌聲，包保令Fans暈得一陣陣！Angela彈結他偶有蝦碌時以傻笑遮醜，但無損分數更添可愛感覺！講多無謂，各位Fans快去片聽女神唱歌啦！

欣賞音樂男

琛仔表示戲中實現了很多少男夢想，包括夾Band及暗戀女神Angela，Angela直言最難忘其中一場海邊戲，被琛仔的歌聲感動：「佢送首歌畀我，令我好窩心，佢歌聲好有穿透力，戲入面又將要離別，感覺係好傷感！（現實中有冇人用音樂感動過你？）咁又冇喎！所以呢套戲幫我圓滿咗呢件事。」Angela表示戲內戲外都很欣賞音樂男，甚至覺得才華比樣貌重要，可能令冇咁靚仔的男士變成靚仔：「我最鍾意係台灣歌手盧廣仲，佢好正，風格同主流唔同，佢啲歌正面，考試同唔開心聽佢啲歌都唔開心番！（覺得佢靚唔靚仔？）靚仔呀！有才華嘅人就有個光環！」她自爆其實非常喜歡唱歌，但最近不時要公開獻唱也覺怕醜，尚未適應：「驚㗎！可能未慣自己把聲，我其實係鍾意唱歌嘅，唔開心嗰陣唱歌可以令自己平靜，之前學結他因為陳綺貞、張懸，因為我歌聲似佢哋都係Soft，唱Rock唔係好啱。（打算做歌手？）等大家發掘吓啦！冇諗咁遠，依家做好演員本分先。」在旁的琛仔即大讚她唱歌有天分，為她打下強心針。

問到兩人戲中有否親熱戲？琛仔故弄玄虛未有直接回答：「戲入面我有啲抑壓，有啲想做嘅嘢未做到，反而Angela係釋放咗，做咗想做嘅嘢。（唔夠喉想再接前緣？）想拍續集㗎！Angela啲戲好好！」他又笑言向來被笑眼神長期似瞓着，Angela卻獨具慧眼看出他眼中團火，Angela說：「有時同啲演員對戲，可能佢哋技巧好純熟，而琛仔拍戲唔算多，但見到佢好有熱誠，眼入面有好多嘢，大家交流得好開心。」

袁澧林服裝：ZUCCa

彭永琛髮型：Alex Ng@神崎

場地：Cookology