藝人黃美棋及攝影師劉翁（Sunny）到觀塘拍攝ViuTV節目《攝.太帥》，以往被人影得多的美棋說：「依家情況唔同喇，我受到男友影響，迷上咗攝影。（情侶之間會影啲大尺度嘅相？）點大尺度法先？平時佢夾band我有幫佢影，佢話我做乜影親佢都係佢唔靚仔嘅表情？哈哈哈，我睇番發現又係喎！咁我第時影番多啲佢靚仔嘅相！」

分享撞板經驗

劉翁則搞笑表示：「我成日叫老婆影啲得三塊葉嘅相，佢死都唔制，話三塊葉太細，遮唔晒我，佢係點都唔肯揸機幫我影！今次做呢個節目，見到啲參賽者個個撞板，諗番當初自己入行都撞過板，我唔敢話教佢哋，但我會分享我嘅撞板經驗，如果佢哋肯聽，即係等於走少咗十幾年嘅冤枉路。」