拎過英皇新秀冠軍　譚永浩星途兩度跌倒

無綫藝人譚永浩（Jarryd）擁有煞食笑容，一笑起來親切感大增，甚有洪永城的影子，多棲發展的Jarryd主持、唱歌及拍劇樣樣掂，近年因主持《激優一族》及《安樂蝸》為人認識，又開網上群組《喂霞姨》拍片唱歌，人氣大增。

星途有阻滯

其實Jarryd已入行一段時間，但星途並非一帆風順，2004年只得16歲就拍攝劇集《四葉草2＠赤印沙記》，其後於2010年成為英皇新秀歌唱大賽金咪得主，奈何兩次都因為經理人公司問題而事業嗌停，到2012年再接再厲報讀無綫藝員訓練班，問到可曾因事業不順而情緒低落？他說：「當時一入行就有經理人幫我安排參演《四》，但之後佢哋解體，嗰陣我冇咩野，只係得16、17歲，覺得喺街已經有人認得我，幾開心咁。到過左一、兩年，就完全冇咗人氣，咁我仲讀緊書，但都好想入行，於是做吓貸款Sales，令自己冇咁怕生保。之後參加英皇新秀，贏咗喎，覺得夢想到喇！不過當時佢哋人手調整，我未啱公司方向，等咗兩年都出唔到碟，呢次就好困擾喇！我惟有繼續做兼職模特兒拍吓廣告，睇吓仲有冇機會。（點解會加入訓練班？）有次Casting電影《非常完美》男主角王力宏stand in，即係好似替身咁每場戲幫佢夾一次，佢未到之前要幫佢夾好晒啲位，同導演溝通定，再同男主角討論番，雖然唔係真正男主角，但都要識演戲。但最後因為我演技唔夠，我Cast唔到！亦因為呢次我想學做戲，咁啱見到訓練班個廣告，當時覺得如果呢次都係唔得，就放棄，但仲算成功入咗，之後亦好幸運，有啲角色演，亦有唔同機會好似做主持咁。」

冠軍名銜有壓力

關關難過關關過，Jarryd愈戰愈勇，現時變得更有決心：「雖然之前嘅路係比較多波折，但我覺得每次都係一個學習，經歷咗咁多，我已經Ready好晒，有足夠信心行落去！（鍾意唱歌、演戲定主持多啲？）老土咁講，三樣都鍾意，但最愛始終係唱歌，係細個志願！不過拎咗英皇新秀冠軍之後反而懷疑過自己，孭住冠軍呢個名，大家對我好有期望，覺得一定唱得好犀利啦！令我反而冇咗自信，唔敢唱，到真係解咗約，甩咗歌手名銜，有朋友同我講唔好太大壓力，當唱歌係興趣啦！我即刻豁然開朗，舒服晒！依家有錄吓Cover，亦有登台騷，希望之後都可以唱多啲歌。」