杜德智高歌贈興　可宜爆生日收99支玫瑰

有線前主播可宜尋日28號正日生日，佢一班朋友專登為佢舉辦一個生日派對，令可宜開心到跳舞，佢笑住話自己喺現場又唱又跳娛賓，玩得好開心！而圈中好友杜德智同李樂詩都有到場祝賀佢，杜德智仲即場高歌一曲送畀可宜做生日禮物。<br/><br/>問到有咩生日願望？回復自由身嘅可宜話最想工作順利：「手頭上有代言傾緊，都陸續有唔同類型嘅工作傾緊，想多啲發展。」至於收到咩生日禮物，可宜就話收到好多，當中有公仔同99支玫瑰花。