演十幾歲村姑　王菀之嚇窒：我好大個喇

藝人王菀之（Ivana）及導演許鞍華為電影宣傳，當中36歲的Ivana大爆要飾演一位年僅十幾歲的鄉村小姑娘，令她坦言接下角色時頓時嚇窒。她直言飾演小姑娘好有難度：「有，我唔知點算，初初知道要演一個年紀咁細嘅女仔，我心諗『導演其實你會唔會諗錯咗我？我好大個喇喎！』（你皮膚仲好好？）我覺得皮膚冇得搞，因為冇辦法。我抽脂同拉皮都趕唔切啦！」

讚Ivana夠可愛有演技

導演許鞍華笑指覺得Ivana夠可愛又有演技，故相信對方能勝任角色：「我覺得佢好Cute，感覺佢好細個，本身以為佢廿幾歲，咁廿幾歲演十幾歲都OK，我好Sure佢演技會做到。佢喺片中咩都要做，要演好多極端情緒。一係做唔到，一係做過咗，但佢好好咁完成任務。」

同周迅對戲

問到Ivana拍攝時遇過甚麼難忘事？片中要與周迅對戲的她，笑稱首日步入片場就感到強烈壓逼感：「我初初知導演同班底就好緊張，大家太好。我一行入去片場就好有壓逼感，但大家都好有耐性。我對住周迅，直頭成個人放心晒。一開鏡頭嗰刻就忘記緊張，演員同導演都令我好入戲。」

CREDIT:

場地:hooray bar & restaurant

王菀之髮型及化妝:kate shek@Hair Culture、Ling Chan@Zing The Make Up School