坐正做星夢一哥!周柏豪揚言想做視帝

20170711
東網電視
更多新聞短片
周柏豪正式加盟「星夢」做一哥!
歌手周柏豪出席加盟「TVB NEW MEDIA及星夢娛樂」記者會,柏豪以紅黑色西裝現身,當星夢老闆何哲圖上台時更直呼柏豪為「星夢一哥」,而柏豪接受訪問時形容加盟新公司是「人工高、福利好」,新公司將以三年內有八位數字這個酬勞邀請他加盟,柏豪指酬勞令人驚訝。
將拍更多電視劇
柏豪台上說:「多謝各位嘉賓出席我嘅大日子,今日我好緊張,感覺好似大個仔。2017年7月係我入行10周年,回想呢10年好多人都幫過我,舊公司亦幫我實現咗好多夢想,所以亦都要多謝幫過我嘅人;而新公司同我嘅理念一致,希望大家一齊出發。而目前最期待嘅工作係拍電視劇,會投放多啲時間係呢個Project度,嚟緊會拍嘅劇集係《再創世紀》,當年《創世紀》播嘅時候自己都有追睇。」
余詠珊杜之克送賀禮
至於無綫副總經理(節目及製作)杜之克及助理總經理(非戲劇製作)余詠珊都先後上台給柏豪送上閃爆賀禮,並祝柏豪於樂壇上發光發熱。而余詠珊更笑言柏豪這兩年有兩件大事發生,一個是他結婚,但柏豪選擇秘密結婚,所以她無法參與,到第二件大事她終於可以參與!
上年已經討論加盟
問到柏豪被老闆何哲圖直呼「星夢一哥」,感受如何?他直言:「佢先係一哥,其實我喺屋企排第二,我有個哥哥嘅。(工作係嘛!)乜稱呼都好啦,總之男人嚟講,唔好做九叔啦。今日好開心,呢一、兩年自己發生咗好多大事,今日我都好緊張,仲緊張過結婚。」講到杜之克透露早於上年他和黃翠如拍《愛情來的時候2》就開始跟他討論加盟一事?柏豪謂:「都係,因為大家理念一致,又喺人工高、福利好嘅情況下…(好高簽約價?)幾驚訝㗎!自己都覺得係好機會,而TVB NEW MEDIA係Management(經理人合約),而歌手約係簽星夢,再加種星堂,佢哋係我人生嘅三個伯樂。(邊個有最大話事權?)其實大家一齊陪我去實現我嘅夢想,Herman喺音樂上面會畀好大自由度我,畀我做自己想做嘅音樂,佢哋負責backup我。」
何雁詩嗌師兄
問到柏豪是否愛唱劇集歌,他說:「嚟緊會唱《使徒行者2》主題曲,Herman係好老闆,好放心畀我去做。(想有首洗腦歌?)每個歌手都想有首令人耳熟能詳嘅歌,自己都好想唱劇集同電影主題曲。」問到是否想攞「最受歡迎男歌星」獎?柏豪坦言:「咩獎都想攞!(攞埋視帝啦?)如果有機會都想攞,但學嘢先啦,自己喺呢間公司都係新人。尋日有好多合作過嘅演員、朋友都有恭喜我,好似何雁詩都有send message畀我叫我師兄,叫我睇住佢,我同佢講係師弟先真。(佢梗係send畀你啦,你坐咗佢男朋友鄭俊弘一哥個位?)冇分㗎,大家年輕人,見到位就坐啦,冇分㗎!(但Herman分咗喎?)係儀式啫。(唔怪得許廷鏗要走啦?)真係咁啱,大家都係Good timing搵到大家想做嘅嘢。」
另外,對於柏豪加盟星夢,其經理人公司種星堂負責人表示:「周柏豪係TVB NEW MEDIA與種星堂Co-management,唱片則由星夢與種星堂共同打造,而音樂製作則起用周柏豪御用班底。」他坦言與TVB關係親密,會一起努力賺錢,問到誰話事權多一點?負責人表示:「睇做嘢嘅target,我同Herman(何哲圖)識咗十幾年,都合作過,大家清楚大家,都係為件事好。」
而講到公司就旗下藝人連詩雅遭華納唱片控告,種星堂負責人表示:「呢個位唔講得,去到司法程序,唔可以影響種星堂負責人Case。」至於提到公司控告旗下藝人袁澧林違反合約, 他同樣亦以去到司法程序為由,不能透露詳情,但講到雙方合約去到2018年,他謂:「期間我哋仲會繼續做,做經理人有責任繼續捧佢,所以會照做。」