蕭正楠翠如日本放閃　曹永廉：得而誅之

藝人蕭正楠（Edwin）同黃翠如呢對圈中模範戀人感情相當穩定，兩人不時喺社交網隔空傳情，今日Edwin又再放閃，佢上載一張有兩對腳嘅相，眼利網民估到呢兩對腳分別屬於Edwin同女友黃翠如，而兩對腳踩住咗印有魚圖案嘅地板，地板寫咗日文「水族館」，應該係佢兩個去日本旅行時影嘅相。

咁都未夠Sweet，最甜嘅係Edwin留言話：「Wherever the fish are, that's where we go. ​​​​（無論魚在哪裏，那就是我們去的地方。）」而黃翠如個名「如」跟「魚」諧音，即係黃翠如去邊，蕭正楠就會跟去邊，簡直冧死人，網民都話：「好閃呀！」

Edwin除咗有個好女友，仲有個好兄弟，佢就係曹永廉，今日曹永廉都有上載二人合照，其中一張係Edwin以古裝造型扮女人，真係好「嬌俏」，曹永廉都忍唔住留言話：「穿越4百年來打救世人，特別想打救你@蕭正楠Edwin……你，你個樣真係人人得而誅之。」