網民熱話：港男Alex浮誇喊樣嚇窒心悠

每個人心目中都有一個女神，雖然大家對女神嘅定義可能唔一樣，不過見到女神嘅時候，相信大家嘅反應都會好似曾經參選香港先生嘅「法國紋身男」麥凱程（Alex）一樣面都紅埋！無綫嘅官方facebook專頁 「See See TVB Facebook」就上載咗一段Alex遇上女神劉心悠嘅片段。

去見女神，當然唔可以兩手揈揈啦！而Alex就推咗部美食車去等劉心悠，當Alex一見到身穿古裝嘅心悠行過，佢即刻好大聲咁話：「嘩，劉心悠呀！」仲衝埋去問：「係咪你呀？」心悠都畀佢嚇咗一跳。不過心悠一知道Alex其實係嚟探班，佢都滿心歡喜，仲同Alex大講特講添！既然有幸見到心悠，當然要向佢偷吓師學演技，學吓點樣可以容易啲喊。

心悠就建議Alex諗吓自己嘅寵物受傷或者畀人蝦嘅畫面，而Alex聽完心悠嘅建議後就即時學以致用，喺心悠面前爆喊。見Alex喊到既真誠又感動又傳神，又喊到好似劏豬咁聲，心悠都忍唔住喺隔籬偷笑，之後心悠仲話Alex喊得慘過佢添！一班網民大讚心悠靚女之餘，仲話Alex啲演技好正，連藝人李綺雯忍唔住留言：「好笑呀呢個」

網民有話兒：

HxxTxxx Chxx：劉心悠啲廣東話都幾好喎@@

Glxxxx Kxxx：麥凱程啲反應好好笑XDDD

Rxxxx Chx：麥凱程佢個扮喊樣真係不得了XDDDDDDD

Jxxxx Yxx：佢個喊樣真係不得了！！！！