【獨家】吳若希抱B女快閃返港做檢查

歌手吳若希（Jinny）產女後雖然已正式復工，但目前她仍是主力湊女。今日東網接到讀者報料，指在澳門碼頭見到吳若希抱住B女乘船返港，東網記者即趕到上環碼頭，見到Jinny抱B女正登上友人的藍色座駕，之後直駛到中環都爹利街一商業大廈。見到該處有很多兒科醫生診所，Jinny全程不假手於人一直抱住B女，原來Jinny男友Alex也在車內，同行還有陪月姐姐。Jinny落車後即以手遮住B女淼淼（暱稱）樣子，見到B女正在熟睡中。

B女體重15磅

在診所內逗留了一個小時後，Jinny抱着B女落樓。由於友人的座駕仍未駛到，Jinny就站在大廈門口等候，而B女則在Jinny懷抱食住奶嘴繼續瞓覺。Jinny透露今次返港是因為女兒要做定期檢查，醫生指B女很健康。問到B女幾多磅？她笑說：「15磅。（醫生有冇話超磅？）冇，話佢係西人體重。」

男友唔開工陪母女

Jinny透露已正式復工，亦已開始工作，不過暫時她還是要澳門、香港兩邊走。問到將來囡囡長大了，會否搬返香港居住？她即刻望住男友Alex笑說：「睇佢決定。」記者讚Alex是好爸爸，專程陪兩母女返港睇醫生，Alex笑說：「係呀，連工都唔返。」至於Jinny則表示轉頭便返回澳門，之後一行四人就登車離開，上車時Jinny不忘跟記者揮手拜拜。