汪明荃望連任八和會館主席

藝人汪明荃（Liza）到油麻地出席八和會館2017會員大會暨第38屆理事會選舉，身為現任理事會主席的她表示任期即將屆滿，將選出新任理事會主席及成員，亦會回顧前一年的成績。問到對大會有何展望？Liza表示要開到會先：「今日係要有100會員先開到會，但大家都好散漫，我哋有近千會員，以為會好順利開到會。（想再當選主席？）都想，如果大家選我我會做，之前有份推動西九龍戲曲文化中心，雖然年底落成，但都要明年底先開幕，自己都一手搞，想圓滿件事。」

講到前一年的工作，Liza表示：「主要有三項，第一係6月30日到7月2日搞咗個劇目，動員200幾人演出，仲有14位係由廣州嚟助陣，當中更有人係近60年冇演出，係做到承傳藝術；第二係延續三年計劃，之前係油麻地戲院做咗第一個三年計劃，依家已經展開第二個；第三係我哋喺機場、銅鑼灣都搞咗粵劇展覽，亦安排年輕演員去成都、重慶、北京、廣州、杭州以及台灣等地去交流。」