阿嬌孤伶伶　張智霖唔做媒幫佢收兵

藝人張智霖（Chilam）與鍾欣潼（阿嬌）出席新片首映，穿上露腰長裙的阿嬌於上台時踩到裙腳，Chilam見狀即扶她一把，及後二人合巹交杯飲酒預祝票房大賣，阿嬌豪氣把酒一飲而盡，更把酒杯拋落地。

身體現毛病

眼見阿嬌清減不少，就連Chilam也讚她比拍攝時消瘦，他謂：「嗰時圓潤啲，而家唔同咗！係兩種唔同嘅美感。」阿嬌則笑言拍攝時身形要遷就闊大戲服，更謂：「之前係試過賀爾蒙失調，睇醫生後應該好番，同埋食嘢均衡啲，較注重營養，少食多餐，有做少少運動，因為背脊冇肌肉支撐，右手完全冇力，懷疑神經線壓住咗，條頸上下郁都唔郁得，執嘢垂低頭會暈，冇力將個頭抬起，要人幫，所以過兩日去睇醫生。」

連劉心悠都搞唔掂

問到何時開始感到痛楚？阿嬌表示自上月雲頂演唱會後便感覺不適，但不知是否舊患所致。對於好姊妹蔡卓妍公開戀情，阿嬌坦言尚未遇到合適對象，在場傳媒即叫Chilam介紹？他聞言即謂：「又係我？我連劉心悠都搞唔掂，但身邊真係好多黃金盛女，男士們真係加把勁，但要做媒人公好驚，介紹咗如果唔啱就累咗人，不過我身邊冇盤，男性朋友都係走冇鬼用路線，冇膽識，有的話就一早畀人擸晒啦！」