遺傳昆凌基因　周杰倫囡囡金髮勁吸睛

台灣天王周杰倫（周董）老婆昆凌日前大方公開豪宅，屋內嘅360度景觀台真係令人睇到嘩嘩聲，而呢次佢就大晒溫情，同樣有亮點噃！

從來未公開過仔女正面嘅佢哋，呢日昆凌就喺facebook上載咗張相，見到大約2歲嘅囡囡小周周（Hathaway）企喺草地上，外公企喺隔籬望住個孫一面幸福！雖然只係見到小周周背面，但今次係清晰全身照首曝光，而焦點就係小周周遺傳咗媽咪「澳洲、台灣、韓國」嘅混血基因，生得一頭淺金髮，非常得意！

昆凌留言話「Family day ❤️ grandpa 保姆（母）日」，tag住「爺爺」同「grandpa」，似乎昆凌搞錯咗外公同爺爺喎，網民都留言話應該係外公，又大讚小周周好可愛，仲難以置信咁講「杰倫小孩是金毛」呀！