十幾年後再合作　陳煒袁文傑合照吸Like

曾經風光一時嘅亞視想當年真係有唔少經典劇集，要數精彩作一定有古裝劇《雪花神劍》。呢套劇劇情緊湊，而且演員顏值爆錶！主角陣容有新入行嘅兩大亞姐冠軍陳煒同楊恭如，仲有英俊小生袁文傑，搞到好多人到依家都仲記得呢套劇。

相隔多年後，楊恭如就少拍劇享受人生，而陳煒、袁文傑就加入咗無綫繼續演藝事業。呢日，陳煒突然喺微博貼出同袁文傑嘅合照，仲留言：「十幾年冇同你開過工啦 @袁文傑 而（依）家叫你傑仔好呀、高佬好呀、定係游生好呢？」合照一出，唔少網友都紛紛畀Like，仲話好懷念兩人當年喺《雪花神劍》嘅情侶組合，而袁文傑亦似乎好有同感，佢轉發陳煒嘅博文，並以兩人角色名相稱：「方兆南、玄霜！」網友見到後都大讚兩人好襯，仲話佢哋Keep得非常好！