王君馨拍咀戲　老公爆粗點曹永廉相

藝人蕭正楠（阿蕭）、王君馨（Grace）、曹永廉（阿廉）等到觀塘宣傳熱播劇集《超時空男臣》，與一班小朋友玩遊戲，齊齊裝飾蛋糕。

Grace於昨晚的一集與阿廉有咀戲，她表示老公Daniel看到即講英文粗口：「我尋晚同老公打邊爐，佢第一次睇就係呢集，佢見我咀阿廉話就Dxxx（該死），跟住問我邊個嚟。」阿蕭即謂：「畀我見到我鍾意嘅人錫阿廉，我都講粗口啦！可能仲多字，有七個字。所以佢已經好保守、好有禮貌、好有修養。」當Grace老公知道全劇有32集時，他再次爆英文粗口。

阿蕭禁翠如同阿廉拍咀戲

問如果女友黃翠如與阿廉拍咀嘴戲會否呷醋？阿蕭笑說：「我叫佢推咗套戲添呀！我真係接受唔到。」如劇集一直有好收視會如何慶祝：「你（Grace）同阿廉再咀，如果尋晚睇完收視好，觀眾係鍾意睇你哋咀。」Grace亦笑謂：「我驚佢（阿廉）有生命危險，我老公認得佢個樣。」

而阿廉則表示太太不在港未有收看，他笑說：「可能佢睇完仲嬲，不過我哋（與Grace）都冇呻脷。（Grace老公睇到爆粗！）佢先生會覺得奇怪啲，佢想講粗口但係唔正。你拍床上戲時咪唔好畀佢見到？（如果你咀翠如呢？）我都唔敢接，無謂啦！」此外，阿廉透露稍後將與何廣沛有咀戲，問到是否比咀王君馨更安全？他笑說：「唔安全呀！幾廿歲轉性（取向）就冇謂啦！」