吻賀女兒惹風波　李國麟話係個女主動錫

綠葉演員李國麟日前同屋企人齊齊慶祝女兒15歲生日，因為一張父女錫錫合照，引來內地網民討論，有人力撐佢咁做冇問題，亦有人話佢個女已開始長大，唔應該咁做。事後李國麟接受東網電話訪問，佢話張相係日前同個女、太太以及一班內地朋友慶祝時影嘅，而今日就去咗澳門慶祝。佢又話個女放埋暑假即將升上中四，仲話個女BB嘅時候，大家已經用呢種溝通方式，佢話：「當日同個女、佢嘅朋友仔、太太同埋我媽媽食飯慶祝，吹蠟燭嗰陣，個女主動話要錫錫，咁我可以點呀？之後朋友就舉機影相，但我冇諗過咁大迴響，新聞出咗之後，自己冇睇，都係朋友send畀我，其實我未睇新聞都知人哋點諗，世界上唔同嘅人有唔同嘅感受，但係唔會影響我哋父女之間嘅相處。」李國麟又話其實佢同媽媽都係咁樣去相處，仲話：「有人問過我，我咪話媽咪係用嚟錫，唔通用嚟打咩？」

趁機教女

問到個女有冇唔開心？佢話個女冇唔開心同尷尬，仲話個女有問佢咩事：「我趁機同佢上一課，每個人有唔同睇法，人哋要發放負能量都冇計，我哋要發放正能量，我知我哋點相處就得。」

此外，李國麟女兒亦有喺微博回應呢件事，佢話本來同大家分享件開心事，但冇諗過大家會咁諗：「很失望，真的很失望。本想與大家分享這美妙的一刻，只是純粹的與大家分享，沒有奢求過大家的祝福，但也沒想過會引來這麼多的唾罵。女兒親爸爸，一個傳達愛意的舉動，在我眼裏，我看見滿屏都是父愛，在你們眼裏卻想到亂倫。一個發自親情的吻卻被人們說得如此低俗，我真的感到很可笑。​​​​」另外，李國麟透露姑姐不幸在廁所跣倒，送院後返魂以乏術，故李國麟現時有很多事情要處理，無暇顧及其他東西。