繼「幫朕check吓」　陳豪再創走音式Sure

藝人陳豪向來都係超級「愛妻號」，近日佢太太陳茵媺（Aimee）帶埋三個仔女返娘家多倫多玩，但陳豪要開工，所以去唔到，但佢竟然越洋送咗束靚靚鮮花畀老婆，好多男士都「投訴」佢做壞規矩！

究竟陳豪忙緊乜呢？就係拍緊新劇《誇世代》囉，呢日See See TVB Facebook專頁上載一條短片，藝人麥凱程 （ Alex）偷雞「鼠」入《誇世代》主景之一銀行景，仲畀佢撞到收工嘅陳豪！Alex第一次見到視帝，緊張到手都震晒，佢仲主動請陳豪食零食，不過陳豪就話自己減緊肥，最後只係要咗支茶，網民都問點解唔係咖啡嘅？

之後Alex仲對陳豪作出一連串提問，陳豪都好有耐性解答，仲帶Alex參觀呢個勁寫實嘅銀行景，陳豪話自己喺劇中做大堂經理，有一間屬於自己嘅房仔，不過就細咗啲，最搞笑係陳豪話自己角色名叫「Mike鄺」，發音好似「米缸」，又為大家解構場景入面嘅股票資料係唔可以用真實資料㗎，真係長知識呀！

不過最爆係陳豪臨尾自爆其實喺劇中係打拳嘅，所以要食大隻佬餐單練大隻，仲愈講愈激動，繼而高音爆出一連串英文：「Pick Up」、「Oh my god」！當Alex自薦話自己身形唔錯，可以做佢替身，問陳豪得唔得？陳豪即刻話：「Sure」，但因為太高音嘅關係，竟然走音喎，搞到陳豪自己都滴晒汗！網民就叫Alex放過陳豪，畀佢快啲返屋企同老婆仔女玩facetime，等佢唔使咁心掛嘛。

網民有話兒：

小白x：套劇好似幾好睇

ngKAxxy：陳豪呢個髮型顯得額頭好光（唔好打我）

Baxx_Chan：Sure～～音都走埋

mo仔xx：幫朕check下（吓）！

Petxx yXX：米缸你好！！