孫耀威感激陳美詩照顧：多咗個人鬧我

藝人孫耀威（Eric）與陳美詩（Macy）今日舉行婚禮，兩人交換戒指兼完成儀式後，一對新人表示有說話要同在場親友講：「我要多謝一啲人。首先，要多謝我屋企人將我養到咁大，其實由我入娛樂圈開始，我諗佢都擔心到依家。曾經我喺出面唔識做人，闖禍啦，得罪人多稱呼人少，招招積積啦，不過今日我就喺大家面前行人生嘅另一步，希望我屋企人就唔使擔心我啦，因為都多個人照顧我，多個人鬧我，所以唔使擔心。」

之後Macy就話：「雖然我冇喊出嚟，但係我個心裏面都好感恩，今日呢個婚禮，係我人生一個好美好嘅一日，我好多謝每一位。首先我想多謝我daddy、mommy，由細到大真係畀咗全心全力，將所有時間，將所有心血，全部都係擺咗喺我同細佬身上面，你哋為家庭付出嗰種心，永遠都會係我嚟緊建立我自己家庭嘅榜樣。」