動漫節：梁榮忠感冒戴口罩遮殘樣

藝人梁榮忠到灣仔出席動漫電玩節活動，擔任模型比賽評判及頒獎嘉賓。他表示患上大感冒，加上樣子很殘，因此拍照及訪問時都不肯脫下口罩。他坦言評審準則很簡單，就是要靚。提到他很喜歡模型，他自言是第一代宅男：「依家唔講屋企擺幾多嘢，係講個倉有幾多嘢，同有幾多個倉。我有兩個，不過冇古仔（古天樂）嗰個咁大。佢真係極品，收集嘅都係1：1嘅珍藏。」他笑言有一道「嘆息之牆」，模型買回來都不打開：「砌到一道牆咁高，望住佢嘆氣。（用咗幾多錢買？）唔好講，驚畀阿媽鬧。」

梁榮忠認為買模型的錢有限，不會比買樓多：「古仔用一層樓嘅價錢買玩具，升值可以幫佢買多兩層樓，我嗰啲就頂多幫我賺兩餐飯。但係辛苦完，買啲嘢氹自己開心，娛樂嚟，應該要有。」他表示小時候會辛苦儲錢偷偷買模型，有3港元零用錢，就儲起2.2港元：「儲夠20蚊（港元）就買。（媽咪有冇發現？）依家梗係冇，點敢畀阿媽嚟我屋企，細個就會攝新嘢喺床下底、房門罅。大個咗好多朋友都一樣，不過變咗瞞住老婆。」

提到Cosplay，梁榮忠自爆有高達駕駛員的服裝：「不過依家唔啱着，激氣！30歲嗰時買，入咗行先有錢買，呢啲衫郁吓都成千蚊。」問到在哪裏Cosplay？他直言：「梗係屋企啦！唔通喺街，我不知幾羨慕依家啲人可以着出街，我嗰個年代着出街，仲唔畀人指住嚟鬧！」他認為現在大眾的接受目光闊了很多：「如果10年前有人咁着喺港鐵行，你會覺得佢傻嘅，依家就冇乜嘢。」