方力申口花花話揸　黃心穎嚇到呆

藝人黃心穎（Jacqueline）以大露背背心到紅磡出席明星籃球賽活動。雖然不會落場打波，但她話自己一向鍾意籃球：「都打到中四，校隊嚟，係咪睇唔出呀？不過之後媽媽停咗唔畀我打，因為驚打波手粗腳粗，改咗我去跳中國舞。」

後悔冇睇NBA

問有否最喜愛的球星？心穎指近年少睇波，但之前最鍾意名將卡達（Vince Carter）：「以前喺溫哥華時灰熊隊好渣，所以一路都冇入場睇賽事，依家諗番起就覺得遺憾。將來去美國旅遊都希望睇吓NBA，今日當係過吓癮先。」

聽到都呆一呆

提到日前方力申在香港演藝人協會晚宴中，口花花撩心穎說「捐錢可以揸佢……隻手」，心穎指對方係講笑：「當時聽到都呆一呆，但都知佢係講吓笑。（揸你喎！）都唔會有人咁做啦！（會唔會佢係飲大咗？）應該就未嘅，我自己就覺得冇乜嘢。」

馬國明未知事件

有網友指方力申不尊重女性，心穎就指自己沒有看到有關言論：「我就冇咁嘅感覺，亦都冇諗過件事搞到咁大。（緋聞男友馬明國有冇嬲？）唔知喎，佢應該都唔知呢件事。」