未有對手戲!夏文汐爆同黎耀祥過晒電
藝人夏文汐為無綫新劇《逆緣》開工,拍攝與黎耀祥首場雨中偶遇戲份,劇組出動水車協助拍攝,左腳踝貼上藥貼的夏文汐,透露角色與現實生活均篤信風水:「最近搬入一個apartment,張睡床對住個廚房,即係對腳撐住灶君,唔太好,之後就扭親腳,依家要求換過另一個間隔嘅單位。」
談到與視帝黎耀祥合作,夏文汐表示雙方雖未正式有對手戲,但感覺非常良好,就連互望時的眼神也充滿電力。問到可習慣無綫拍劇方式?她謂:「慢慢習慣,依家最長一日都係拍12個鐘,有時唔使添。(錫住你?)係主景未有我咋,遲吓就知味道,預計下月1號起,打後個幾兩個月都要通頂拍,依家就先甜後苦。」更指無綫高層樂易玲及監製王心慰也很照顧她,不時與她研究角色,她謂:「暫時我都係遇到小問題,係有日同黎諾懿拍深情戲份,眼神感情未到位,研究之後補拍好啲!」
談到於酷熱天氣下開外景,夏文汐也大感頭痛,問到可有消暑準備?她謂:「風扇冇用,風都係熱嘅,但佩服黎諾懿拍4、5個鐘一滴汗都唔出,仲要着厚西裝,心諗佢係唔係人呀!原來秘訣係唔好郁。」