「胡說八道會」一班好姊妹胡定欣、胡蓓蔚、姚子羚、胡杏兒等，去咗澳洲為無綫拍攝特輯，雖然各人早前都有上載喺香港機場出發嘅相片，但就未見成員黃智雯同行。不過原來黃智雯已經靜雞雞去咗當地會合一班「好姊妹」。姚子羚同胡定欣都有上載齊人嘅合照，姚子羚被黃智雯瞞騙仲叫佢做死婆，佢話見到佢嘅出現感到自己都眼濕濕，佢發文話：「正當我地（哋）以為黃智雯有好大機會去唔到澳洲嘅時候～呢個死婆原來欺騙我地（哋）感情～喺Qantas Lounge出現～搞到人地（哋）眼濕濕～雖然你呃左（咗）我地成個禮拜！但你呢個surprise好正囉！Yeah～～～我地（哋）胡說八道終於冇六缺一…真真正正可以胡說八道去旅行啦！一個都不知道少。」而胡定欣就表示「有人呃咗我地（哋）成個星期話去唔到，搞到我地（哋）好唔開心，原來....你....黃智雯，你好嘢！！！」

黃智雯都有喺社交網站發文，佢留言：「為左（咗）比（畀）呢個surprise班姊妹，失眠左（咗）好幾日！sorry gals，搞到你地（哋）變喊包，唔齊腳點叫胡說八道去旅行。。」