自爆次次畀人飛　謝賢倒吊拍面去皺紋

影壇表青樹謝賢（四哥）最近作客奇妙電視《天下第一Friend》節目，被主持鄭紹康拆解他Chok爆不老之謎。謝賢率先爆屋企有部倒吊機：「我日日都要吊幾次㗎！」年屆八十，但仍有一頭濃密頭髮，問是否與倒吊有關，他即謂：「早年我本來有一撮白髮，後來吊吊吓就冇咗，都幾神奇！不過我媽媽102歲過身時，都有好多頭髮，而且仲係灰色嘅，我希望第日都可以好似佢咁！」原來謝賢每日玩倒吊，還邊吊邊拍打面部減少皺紋。

要分年齡Chok

至於飲食作息，他坦白說：「我乜都食，從來唔戒口，以前仲會打通宵牌，依家得閒就去行山。醫生幫我定期檢查，各種指數都正常，我應該仲可以撈多兩、三年嘅，哈哈……」

對於招牌Chok樣，謝賢強調從來沒有刻意去經營：「我只係因為做呢行唔可以失禮人，所以打扮下啫，Chok係人哋覺得！」問覺得自己和兒子謝霆鋒誰更Chok？四哥笑道：「我係老人Chok，佢係年輕Chok！」

首部片酬150元

原名謝家鈺的謝賢入行後花名一大堆，包括「阿腎」。他解釋：「以前我好百厭，開工成日玩，前輩咪話我『腎腎哋』囉，耐咗索性叫我阿腎！」當年謝賢由家姐看到招聘廣告推薦入行，首部電影片酬有150港元，足夠當時普通人家一個月的消費，很快謝賢已經紅透半邊天。

他不諱言事業上也遇過低潮期：「光藝結業後，李瀚祥簽咗我去台灣，頭一年冇戲拍，第二年同甄珍拍咗部戲，之後我就回流返香港開公司。」當年他和甄珍拍拖四年後結婚，但婚姻只維持了一年便告終：「成日話我係溝女王，其實我好專一嘅！成世人都只拍過五次拖，仲要次次都係畀人撇，陰功！不過我傷心都係兩日，第三日已經唔記得晒，可以繼續出去玩，唔係我點可以仲生存到依家呀？哈哈！」