恨同王菀之合作　余香凝預告寫歌冧男友

最近進軍樂壇的模特兒兼演員余香凝（Jennifer）出席電台訪問，她表示很開心由她親自作曲的新歌《你愛的人上》引起大家共鳴：「我作呢首歌想人聽到會諗起曾經一個曖昧過但冇一齊嘅對象，去多謝佢，so far好多人聽完都話會諗起一個人，個成功數字一路一路增加。」她又透露在上星期的新歌發布會上，這首歌所寫的曖昧對象亦有現身支持：「我唱唱吓見到佢嚟咗，佢有同我say hi，我有望住佢唱咗幾句，有諗過同佢影張相，但佢已經走咗喇，佢之後有text我話我唱得好好。」問到當時是否很感觸？她坦言會：「中間有間唔中講幾句，再見面當然唔係愛情，但好多謝佢，有呢首歌係因為呢個人。」而Jennifer正籌備推出第二首歌，是非常甜蜜的歌：「每人都會遇到啲困難，身邊嘅人簡單講一句『唔使驚，有我喺度』，已經係好大嘅支持，好想將呢個message寫落去。（為男友陳家樂寫？）係。」又指會繼續創作能帶正能量的歌曲。

自認唔擅於作詞

問到之後想與哪位歌手合作？Jennifer說：「我想同王菀之合作，有啲妙想天開，但我好鍾意佢，覺得佢好叻，作曲作詞所有都可以自己作，我都希望每首歌可以自己作，以佢為目標。」但她亦坦言自己不太擅於作詞：「我有嘗試過，我好努力諗咗3日3夜，要搵啲韻腳要押韻，又要表達到個意思，我好辛苦先寫到半首，之後畀監製睇，佢話『你玩我呀？』，好大打擊，我依家有增值吓自己，睇多啲書，我自認文筆唔太好嘅，希望有一日作到一首詞出嚟。」講到讀書時期的寫作成績，她笑言很神奇：「我會考作文有A㗎，因為有三條題目揀，我就揀議論文，因為我知自己描寫文、抒情文嗰啲唔得，我同人議論係幾好㗎。（同家樂成日議論？）我哋會討論囉，未到議論，啱定唔啱，或者睇完套戲又會討論吓。（成日說服到佢？）都係㗎。」