藝人陳煒於晚上八時半現身電視城，就正式公開承認五年前與顏志行離婚一事後表現平靜，她說：「今次出嚟講係唔想再牽涉第三者。（心情有冇影響？）始終係太耐嘅事，冇影響。（2016年仲有同顏志行公開拍節目晒恩愛？）始終係未向廣大市民正面公開同大家講番呢件事，要同大家講聲唔好意思。係大家相處方式有問題，相處時間都少，長期分隔，與第三者無關，離婚係佢提出嘅，五年前分開。（大家保持住關係？）有聯繫嘅，唔止朋友，大家好似親人咁，互相關心嘅。」

講到宣布「分訊」，是否歡迎追求者？陳煒說：「都係依家先宣布，點會咁快有？如果我係咁諗就一早公開啦，始終係想保護番私人生活，都有留戀嘅，如果我唔鍾意佢就唔會嫁畀佢啦！（與顏志行一同出席峇里婚禮嘅係新歡？）絕對唔係，對方我都識嘅，佢哋係分別由唔同朋友邀請。（因為離婚而復出賺錢？）唔係，係出番嚟先離婚，工作都係我最重視嘅嘢，公司（TVB）都知嘅，要多謝公司畀機會。」

問會否有機會復合？陳煒表示：「將來嘅嘢冇人知。」