「圈中筍盤」馬國明 （馬明）雖然已疑似被心穎BB封盤，但佢依然好受女士歡迎，仲對私底下嘅佢充滿好奇心，好想知道究竟馬國明放假除咗同心穎BB去睇戲之外，自己獨處嘅時候仲有啲咩做呢？See See TVB呢日就上載一條名為「馬國明放假一天」嘅短片，全片長近三分鐘，Caption仲註明：「聽講睇晒成條片嘅人，超過九成都會被馬明超晒班嘅演技震懾到...笑出聲！」

話說馬國明喺一間房度由頭帶到落尾演出獨腳戲，全片冇對白，但佢以「梁朝偉」式憂鬱眼神演繹放假一日有咩做，由佢發現塊鏡有污漬到抹鏡、坐低發呆、清理垃圾、煮杯麵、倒瀉杯麵，每次都以眼神交戲，展現「以不變應萬變」嘅高層次演技，令網民睇完驚嘆：「到底我睇咗啲乜」？尤其抹鏡嗰一幕，馬國明抹完又抹，最後都係抹唔甩啲污漬，然後佢嘅眼神透過鏡面反映出無奈，呢一吓係幾咁「梁朝偉」呢！之後佢煮杯麵食，喺等杯麵嘅過程中，馬國明坐喺度皺眉兼發呆，網民都留言話食個杯麵啫，使唔使咁悲傷呀？

亦有好多網民發現呢一幕其實係向梁朝偉同張國榮主演嘅電影《阿飛正傳》致敬，話馬國明係參考梁朝偉喺戲中經典嘅一幕，連背景配樂都參考埋！話說嗰一幕係講梁朝偉準備出門，佢喺房度由着衫到梳頭，都係慢動作，零對白，短短兩分半鐘，梁朝偉已演繹出咩叫「憂鬱的美感」，而馬國明版本呢？咪就係憂鬱之中多咗份「天然呆」囉！

網民有話兒：

JoXXph LXm：我相信馬國明放假真係一個悶字，辛苦晒心穎BB

李X瀛：心穎說過~悶有悶的好處

JXXy LXXg Hu：馬萌（明）個表情阿（呀）。。好搞嘢！靚仔放假都吾（唔）使咁無聊架（㗎）！！！

Ho HXXe Xo：冇偶像包袱～演技比做花美男要爛

LXu MXn：我相信真係唔少（小）心…因為連工作人員都笑左（咗）