結婚前後有分別？陳智燊猶豫險辣着老婆

藝人陳智燊（Jason）同老婆宋熙年（Sarah）一向好恩愛，人前人後都勁Sweet，究竟呢對模範夫婦係咪真係咁好感情？佢哋又會唔會嘈交？萬一嘈交時邊個低頭認錯先？知道大家問題多多，呢日陳生陳太就夫妻檔上陣拍片，逐一解答問題！

片中所見，陳氏夫婦齊齊搭車出街，就算有鏡頭喺度，宋熙年都照舊化妝，陳智燊閉眼思考，仲不經意舉起手大晒手臂肌肉，展現真性情一面。之後佢哋開始答網民嘅問題，其中有人問佢哋覺得婚前同婚後生活有咩唔同，陳智燊指分別唔大，但佢話：「結咗婚……都開心嘅！」咦？點解遲疑咗足足2秒先答嘅？就連陳太都留意到，好彩陳智燊識得搞笑氹番老婆，唔少網民都大讚佢轉數快，成功避過危機，叻仔！

之後戲肉嚟啦！宋熙年解答終極問題，就係佢哋會唔會嘈交呢？答案係會，至於認輸嘅一方梗係陳智燊啦！皆因宋熙年自爆嘈交時會不斷講嘢、不斷抒發情緒，最後煩到老公冇聲出。咁容易平息紛爭，睇嚟佢哋都係耍吓花槍，嘈交當促進感情，So Sweet！亦有網民覺得係陳智燊錫老婆先會讓步，果然係廿四孝老公！

陳生陳太仲去咗食Tea，原來嗰度係佢哋當年拍拖成日去嘅Cafe，今次舊地重遊，佢哋亦重溫拍拖點滴，仲分享當年嘅相識過程，宋熙年話：「當年喺TVB，有位男士姓陳識咗一位女士姓宋，跟住開花結果。」唔知陳太係咪怕閃親人，所以講得咁簡短10秒內答咗，但一班網民都聽唔夠喉，紛紛留言求閃爆詳細版嘅愛情故事，陳生陳太收到未？

網民有話兒：

candXXXjai：陳太真係好好，陳生娶到佢係幾輩子修來嘅福氣。

XXERL_06XX：好想聽你地（哋）詳細版嘅愛情故事。

FelixMXXX：Jason轉數幾快，抵讚！

XXXgShirley：陳智燊真係好錫老婆，嘈交都咁忍讓。