藝人黎諾懿今年四月榮升做新手爸爸，唔經唔覺佢囝囝「小春雞」已經三個幾月大，小春雞愈大愈可愛，個樣仲似足爸爸添！餅印囝囝咁得意，難怪黎諾懿錫到燶，就算忙緊開工都掛住佢，要睇寶貝仔嘅短片「望梅止渴」，仲喺微博開心Share。

片中所見，小春雞一頭亂髮搞笑登場，但就有少少天然呆，似乎係啱啱瞓醒，真係Cute到暈！之後媽媽李潔瑩喺一旁問佢知唔知爸爸去咗邊，一聽到「爸爸」兩個字，「小春雞」即刻表現雀躍，仲對住鏡頭手舞足蹈，又展現可愛笑容，人仔細細已經迷死人。爸爸黎諾懿梗係甜到入心，仲冧爆留言：「小春雞掛住爸爸嗎？」