又戴綠帽？羅拔未婚妻FKA與男模出遊被咀

《吸血新世紀》（Twilight）男星羅拔柏迪臣（Robert Pattinson）於2012年被當時拍拖4年嘅女星姬絲汀史釗活（Kristen Stewart）公然送綠帽，事件震驚全城，不過近日疑又戴綠帽！羅拔上月才表示與歌手FKA Twigs「算係」訂咗婚，但女方近日竟被拍到與神秘男於西班牙出遊，男方一度埋身咀FKA個頭，二人雖未拖手攬攬，但全程並排而行咬耳仔，又密密冧爆對望，似乎關係匪淺！

羅拔於2013年與姬絲汀斬纜，翌年撻着FKA，拍拖一年就打得火熱傳訂婚，但男方上月首度開腔回應時，僅表示「算係」訂咗婚，一度令人思疑二人情變。而羅拔日前就被拍到與相識多時又傳過緋聞嘅天后Katy Perry外出，有知情人士指他與FKA嘅感情已幾乎「有名無實」，FKA今次孖神秘男出遊，未知係示威、偷食定係與羅拔玩完即換新仔？

男女主角羅拔與FKA暫時未有回應，但網民就已經好多意見，有人指FKA可能只係同男模拍緊MV，清清白白，有人就鬧爆FKA嘅音樂與個名都衰到貼地，至於外媒「起底組」亦火速開工，爆出神秘男子為法國男模Brieuc Breitenstein。