十字步後續！家燕媽媽跳Salsa舞狂擰腰

講到家燕媽媽（薛家燕）你會諗起咩？係佢首經典兒歌《家燕媽媽》定係佢跳嘅招牌「十字步」？相信呢兩樣都同樣令大家非常難忘呀！不過招牌「十字步」都跳咗咁多年，當然就要搞搞新意思啦，今次家燕媽媽喺新劇《燦爛的外母》將會表演新舞蹈，係咩？原來係Salsa舞，即係類似拉丁舞一種，嘩！一班網民都高呼好期待，仲話唔知道家燕媽媽會唔會將自己嘅「十字步」融入喺Salsa舞中，嚟個Crossover呢？話說Salsa舞都好考腰力又要旋轉，大家都好緊張想知道家燕媽媽嘅表現呀！

想睇家燕媽媽跳Salsa舞就要留意喇，「See See TVB」facebook官方專頁就上載咗一條短片，藝人麥凱程（Alex）就去咗探拍緊《燦爛的外母》嘅家燕媽媽班，仲帶晒零食去同把握機會問家燕媽媽問題兼希望佢會表演Salsa舞啦！家燕媽媽就好有耐性解答，佢就話今次飾演外母呢個角色，而自己出年就做奶奶，同外母嘅身份差唔多，所以非常有感受。佢仲分享有場難忘戲就係劇中阿女結婚，點知前夫突然出現，搞到佢諗起現實情況：「我前夫會唔會突然出現呢？」網民都搞笑話戲如人生，到時真係考驗演技喇！

之後最精彩嘅部分嚟喇，着住件鮮桃紅色跳舞衫嘅家燕媽媽即場表演跳Salsa舞，話要教番Alex兩招呀！見到家燕媽媽帶住Alex跳，跳得似模似樣，不停扭腰加轉身，佢仲話跳呢隻舞嘅秘訣就係「最緊要其實係擰條腰」！兩人又跳得不知幾合拍，完全將Salsa舞嘅精髓表現到出嚟，網民都話簡直係Perfect，仲話估唔到家燕媽媽條腰可以擰得咁勁，唔再係「十字步」，而係「Salsa步」，雖然已經60幾歲，但寶刀未老，有網民仲提議家燕媽媽可以同鄭裕玲嘅鈣質舞嚟個battle，一定精彩到爆呀！

網民熱話：

PPSXX FXEYS：家燕媽媽再現呀！想聽吓佢首經典兒歌。

JXXCXVX CHEXX：家燕媽媽跳Salsa舞得唔得呀？「十字步」加Salsa？

GXXT PLXX：戲如人生，到時真係考驗演技喇！

QXXWXXE MNXX：簡直係perfect，勁。

USXX YXX：家燕媽媽可以同鄭裕玲嘅鈣質舞嚟個battle，期待。