硬住頭皮拍MV　黃淑蔓夠青春惹狂蜂浪蝶

16歲的樂壇新人黃淑蔓今年暑假終於推出第一首歌曲《如果青春不會有盡頭》，日前她到郊外拍MV時惹來「狂蜂浪蝶」，其中更有一隻不知名蟲蟲飛入她的鼻孔裏，她嚇到花容失色，情急之下用手指封閉另一邊鼻孔，使出一招「嗤之以鼻」成功噴走蟲蟲，全場O咀兼爆笑！

前年黃淑蔓主唱的電影主題曲《差一點我們會飛》，獲香港電影金像獎「最佳原創電影歌曲」，她更以14歲之齡奪得叱咤頒獎禮「生力軍銅獎」得主。這兩年她專注學業，直到今年暑假才推出第一首個人歌曲《如果青春不會有盡頭》，並拍攝第一個MV，她拉埋幾個朋友仔一齊拍攝乘機壯膽。

她說：「每個人都希望擁有永遠嘅青春，不過因為青春有盡頭先至咁珍貴。今次係我第一首自己歌拍MV，仲拉埋3位朋友一齊拍，佢哋夠晒青春，同我年紀差唔多又易溝通，拍出嚟效果仲合拍。（請他們客串困難嗎？）佢哋真係夠老友，打個電話唔使30秒就答應，有佢哋參與我第一個MV特別有紀念價值。」而客串的好友亦好有潛質在幕前發展，其中東東是香港名列前10名的女Beatboxer，而Ian（藍色tee）和Jacky（粉紅tee）都是小鮮肉系，黃淑蔓笑言如他們藉住今次MV被發掘做明星，她要攞「媒人」利是！

黃淑蔓續說：「鏡頭前一片綠柔柔嘅草叢好似好靚，但其實好熱又多昆蟲，我真係好驚，但都要硬住頭皮去拍攝。準備上車拍攝時，一打開車門就有十幾隻蚊飛出嚟，其中一隻唔知乜嘢昆蟲仲飛咗入個鼻哥窿，情急之下，我就用手指撳住另一邊噴返佢出嚟！」她豪邁舉止令工作人員都笑傻了！