唔敢取代吳若希？Hana望新歌攞金曲金

歌手菊梓喬（Hana）出席活動，她透露剛從台灣返港，去了三日兩夜拍新歌MV。講到去台灣三日拍一首歌，公司好揼本？Hana說：「因為係新劇《使徒行者2》嘅片尾曲，所以公司都好重視，老闆都有親自去埋。（當年吳若希（Jinny）憑《使徒行者》片尾曲《越難越愛》奪金曲金獎，你都想？）希望啦！」即是全面取代吳若希？Hana即言：「從來都唔係取代，反而係想一齊做嘢，想老闆開一個節目，如旅遊節目，畀我哋可以又食又玩就好喇！雖然同Jinny唔熟，但都知佢係幾玩得嘅！」

至於講到在台灣拍外景，Hana稱因身體比較弱，有貧血及耳水不平衡，今次搭飛機和搭船都出現暈浪，而外景其中一場她要一個人在湖上划艇，她都成功划到湖中拍攝未有暈浪。講到身體差需進補？Hana笑言：「希望老闆幫我搵啲保健產品畀我做代言人，可以乘機補吓。」