廣州騷收唔到尾數　黎明為粉絲照唱

黎明（Leon）在8月11日及12日於廣州國際體育演藝中心舉行「Leon RandomRun中國巡演之廣州站」，在昨晚個唱尾聲時，Leon突然台上似「話中有話」說今次演唱會「發生咗啲事」，呼籲歌迷日後買飛要循正途，Leon在唱最後一首歌《我的親愛》前，跟同歌迷互動說：「今次演唱會發生咗啲事，就交畀佢哋同公司處理啦！我剩係面對你哋㗎啫！仲有以後買飛唔好咁急，搵啲國家認可、合法嘅票務，買完有任何問題，你哋啲錢都有保障，總之唔好咁急啦！」全場歌迷聽完即歡呼尖叫。

有網友在微博發文指Leon被傳拖高達600萬人民幣（同下）製作費，演唱會主辦單位未有履行合約「找數」，拖欠演唱會製作費，同時傳有人用鎖死門票方式以高價賣票招數賣飛，令歌迷要捱高價票，Leon心痛之餘，所以在台上呼籲歌迷要循正途購票。

為粉絲照唱

據知根據合約，Leon絕對有權拒絕開騷並宣佈取消演唱會，可是Leon知道歌迷恨睇騷，除有歌迷專程由其他地方飛往去廣州，又有歌迷買了黃牛票，為免歌迷失望及其他預計不到的損失，惟有堅持開騷及唱足兩場，每場一個半小時的演唱會。

對於傳開騷前收不到600萬製作費尾數？Leon經理人公司發言人王凱文接受東網訪問時表示：「基本該主辦單位未有履行合約內容，未有畀錢已經係毁約！（係咪600萬？）可以講係一個唔少嘅數目，因為係承包晒成個製作嘅款項，而之前對方不論係電郵及文字上回覆都承諾喺係開騷之前會付清，但最終都係冇嘅！而早喺兩個月前，公司嘅法務部都已知道呢件事，公司同法務部都認為唔畀晒錢係唔應該去唱，但Leon就堅持要做呢個演唱會，因為唔想令買咗飛嘅歌迷失望，所以最後決定係做，依家完成咗個演唱會，就交畀法務部去處理。」Leon為歌迷不收足錢照開騷，可怕做壞規矩？王凱文表示：「基本上係我哋係未遇過同類事件，呢個廣州站嘅主辦商係第一次合作，其他站，好似九月喺深圳嗰場嘅主辦單位都係過往合作過。（遇人不淑？）可以咁講啦！而呢個主辦商因只畀咗第一筆款項，之後就冇再畀尾數。」