宣布隱退？田蕊妮劇接劇頂唔順要休息

視后田蕊妮一劇接一劇開工，由《來自喵喵星的妳》、《迷》、《超時空男臣》到《誇世代》，難免有感身心疲累！她趁《誇》劇終於煞科，即於社交網站留言表示「隱退」：「從今天起再沒有別的角色，投入自己的生活裏，之後沒有計劃，沒有目標，只是好好去享受我的悠長假期，活在當下的一呼一吸之間。」

雖然阿田冇話呢個悠長假期會維持幾耐，不過好多粉絲已經話好掛住佢，仲話會好期待佢嘅演出，叫佢唔好休息太耐呀！而歌手吳業坤都有留言：「Bye bye」，仲整個咗喊樣嘅Emoji，好似好唔捨得咁。至於藝人韓馬利都留言：「好好enjoy」。另外，仲有人叫田蕊妮：「休息下（吓），最緊要開心。」而阿田聞言後就搞笑咁反問：「請唔請陪月？」

之後，阿田接受東網訪問笑謂：「我咁寫嚇親大家？真係唔好意思，我只係覺得呢段時間忙於工作，係時候要好好休息，應該去到年尾都冇工作住，係咪悠長假期先？哈哈！」阿田坦言倘若再繼續拍下去的話，擔心自己會變機械人，而接下來的時間怎樣度過，她笑說：「起碼要陪下我爸爸返鄉下、同屋企人去吓旅行，可以匿喺屋企睇買咗又未睇嘅書、畫吓畫咁。（老公呢？）佢嚟緊要去馬來西亞工作，我應該會陪佢過去做助手。我亦趁呢段時間試吓留長頭髮，唔使再為角色造型而費心。」